唔知你地對上海嘅印象係乜,佢係內地一線城市,係比香港更中西合壁嘅地方,係公園大香港一百倍嘅地方,係中國迪士尼樂園所在地……以上都係普遍香港人對上海嘅印象,但最吸引小編嘅都係大量嘅美食同小清新打卡點,以下同大家推薦呢間就係其中一間值得一去嘅廣東菜——一籠小確幸。
店鋪以薄荷綠、白色同木色作主調,店內有手繪風嘅壁畫、鳥籠狀嘅燈罩同原木風格嘅裝修,一入鋪就感覺到撲面嘅小清新氛圍。
坐低之後,侍應會送上檸檬水同籤語餅,餅中間會有一句簡短嘅說話,睇落令人感到好溫暖呢!
而呢度同多數內地食肆一樣,都支持手機下單同支付,以手機支付仲會有優惠添 ! 今次小編用微信支付就攞到十蚊折扣,大家去內地玩之前記住開通微信錢包啦!
講到明美食加打卡,就梗係要同大家推介吓有乜好食啦!唔知係小編好彩定點,今次上海之旅不論大小餐廳嘅食物都非常好食,尤其是呢間,每一次上菜小編同朋友都忍唔住相機食先,因為佢地嘅賣相真係好用心!而且每一樣都好好味啊!以下為大家一一介紹:
呦呦呦西柚麼麼茶
首先,佢顏值100分,上檯嘅時候侍應會提醒你要攪拌均勻先好飲,佢係西柚蜜梳打,西柚味都幾重,好清爽。
三味熔岩兔包子
好可愛啊!呢個兔兔真係令人唔捨得食呢!白色嘅係流心奶黃包;黑色係朱古力熔岩包,但唔知點解有椰子味;綠色呢就係抹茶流心包,小編覺得抹茶味最好食!
金網脆皮蝦滑腸粉
小編覺得呢個必點!腸粉皮以紅米製作,粉紅色薄薄嘅皮包住炸到外脆內彈牙嘅蝦滑,點止係讓我咬一口,係一口接一口啊!
桂花杏仁炸脆奶
呢個炸脆奶熱食又得,攤凍食亦可,首先將炸鮮奶沾上練奶,再點上桂花碎,一咬奶香同花香同時係口入面爆開,好和諧,好開心。
柴犬丸子
成間餐廳都係狗狗咕????又點少得狗狗造型嘅食物呢?柴犬造型嘅烤年糕丸子加上甜甜嘅桂圓蜜,好好味啊!不過始終都係年糕丸子,好易濟。
麻辣火鍋荔枝蝦
其實佢唔算好辣,一般人都應該可以接受。係以去核荔枝肉包住小鮮蝦浸入麻辣湯底,好花心機同功夫。
值得一提嘅係,餐廳內有好多狗狗嘅咕臣,每一張檯上面都立住一張小小嘅牌,寫住:這個冬天,帶我回家。原來每一個咕臣都係以等待領養嘅狗狗相去製成,每個咕臣上面都有領養狗狗嘅資料同QR code,太有愛啦!每隻狗狗都好可愛,小編好希望佢地全部都搵到愛佢地又負責任主人呢!
店內仲有好多食物選擇,奶茶都沖得好香好滑好有茶味,另外小編食過佢嘅飯食都好高質架!滷肉飯仲配瑭心蛋添,其他就等大家自己黎試吓啦!
一籠小確幸
地址:上海來福士廣場4樓